phir kuchh ik dil ko beqarārī hai
sīnah jūyā-e zaḳhm-e kārī hai
phir jigar khodne lagā nāḳhun
āmad-e faṣl-e lālah-kārī hai
qiblah-e maqṣad-e nigāh-e niyāz
phir vuhī pardah-e ʿamārī hai
chashm dallāl-e jins-e rusvāʾī
dil ḳharīdār-e żauq-e ḳhvārī hai
vohī ṣad-rang nālah-farsāʾī
vohī ṣad-gūnah ashk-bārī hai
dil havā-e ḳhirām-e nāz se phir
maḥsharistān-e be-qarārī hai
jalvah phir ʿarẓ-e nāz kartā hai
roz-e bāzār-e jāñ-sipārī hai
phir usī be-vafā pah marte haiñ
phir vuhī zindagī hamārī hai
This verse is the beginning of a verse-set that includes {164, 9-13}.
phir khulā hai dar-e ʿadālat-e nāz
garm-bāzār-e faujdārī hai
ho rahā hai jahān meñ andher
zulf kī phir sarishtah-dārī hai
phir diyā pārah-e jigar ne savāl
ek faryād-o-āh-o-zārī hai
phir huʾe haiñ gavāh-e ʿishq t̤alab
ashk-bārī kā ḥukm jārī hai
dil-o-mizhgāñ kā jo muqaddamah thā
āj phir us kī rūbakārī hai
be-ḳhvudī be-sabab nahīñ ġhālib
kuchh to hai jis kī pardah-dārī hai