See the script bar at the bottom of the page for viewing choices.
[*20* cont'd] use bahut samjhāyā gayā kih dekho ab ṭobah ṭek siñgh hindūstān meñ chalā gayā hai --- agar nahīñ gayā to use fauraṅ vahāñ bhej diyā jāʾegā - magar vuh nah mānā - jab us ko zabardastī dūsrī t̤araf le jāne kī koshish kī gaʾī to vuh darmiyān meñ ek jagah is andāz meñ apni sūjī huʾī ṭāñgoñ par khaṛā ho gayā jaise ab use koʾī t̤āqat vahāñ se nahīñ hilā sakegī -
ādmī chūñkih be-ẓarar thā is liʾe us se mazīd zabardastī nah kī gaʾī , us ko vuhīñ khaṛā rahne diyā gayā aur tabādile kā bāqī kām hotā rahā -
sūraj nikalne se pahle sākat-o-ṣāmat bishan siñgh ke ḥalq se ek falak-shigāf chīḳh nikalī --- idhar udhar se kaʾī afsar dauṛe āʾe aur dekhā kih vuh ādmī jo pandrah baras tak din rāt apnī ṭāñgoñ par khaṛā rahā , auñdhe muñh leṭā hai - udhar ḳhārdār tāroñ ke pīchhe hindūstān thā --- idhar vaise hī tāroñ ke pīchhe pākistān - darmiyān meñ zamīn ke us ṭukṛe par jis kā koʾī nām nahīñ thā - ṭobah ṭek siñgh paṛā thā -
-- "Toba Tek Singh" index page -- *Platts Dictionary Online* -- FWP's main page --
