ghazal
{490}
 
-- urdu script -- devanagari -- diacritics -- plain roman -- more information --
 

*{490,1}

dil ke maʿmūre kī mat kar fikr furṣat chāhiye
aise vīrāne ke ab basne ko muddat chāhiye

*{490,2}

ʿishq-o-mai-ḳhvārī nibhe hai koʾī darveshī ke bīch
us t̤araḥ ke ḳharch-e lā-ḥāṣil ko daulat chāhiye

*{490,3}

ʿāqibat farhād mar kar kām apnā kar gayā
ādmī hove kisī peshe meñ jurʾat chāhiye

{490,4}

ho t̤araf mujh pahlvāñ shāʿir kā kab ʿājiz suḳhan
sāmne hone ko ṣāḥib fan ke qudrat chāhiye

*{490,5}

ʿishq meñ vaṣl-o-judāʾī se nahīñ kuchh guft-gū
qurb-o-buʿd us jā barābar hai muḥabbat chāhiye

{490,6}

nāzukī ko ʿishq meñ kyā daḳhl hai ai bū al-havas
yāñ ṣuʿūbat kheñchne ko jī meñ t̤āqat chāhiye

{490,7}

tang mat ho ibtidā-e ʿāshiqī meñ is qadar
ḳhairiyat hai mīr ṣāḥib dil salāmat chāhiye