ghazal
{522}
 
-- urdu script -- devanagari -- diacritics -- plain roman -- more information --
 

{522,1}

band-e qabā ko ḳhūbāñ jis vaqt vā kareñge
ḳhamyāzah-kash jo hoñge milne ko kyā kareñge

{522,2}

ronā yihī hai mujh ko terī jafā se har dam
yih dil dimāġh donoñ kab tak vafā kareñge

{522,3}

hai dīn sar kā denā gardan pah apnī ḳhūbāñ
jīte haiñ to tumhārā yih farẓ adā kareñge

{522,4}

darvesh haiñ ham āḳhir do ek nigah kī ruḳhṣat
goshe meñ baiṭhe pyāre tum ko duʿā kareñge

{522,5}

āḳhir to roze āʾe do chār roz ham bhī
tarsā bachoñ meñ jā kar dārū piyā kareñge

{522,6}

kuchh to kahegā ham ko ḳhāmosh dekh kar vuh
is bāt ke liye ab chup hī rahā kareñge

{522,7}

ʿālam mare hai tujh par āʾī agar qiyāmat
terī galī ke har sū maḥshar huʾā kareñge

{522,8}

dāmān-e dasht sūkhā abroñ kī be-tihī se
jangal meñ rone ko ab ham bhī chalā kareñge

{522,9}

lāʾī tirī galī tak āvāragī hamārī
żillat kī apnī ab ham ʿizzat kiyā kareñge

{522,10}

aḥvāl mīr kyūñkar āḳhir ho ek shab meñ
ik ʿumr ham yih qiṣṣah tum se kahā kareñge

 

{522,trans.}

Translations