ghazal
{932}
 
-- urdu script -- devanagari -- diacritics -- plain roman -- more information --
 

*{932,1}

kyā chahre ḳhudā ne diye un ḳhvush pisaroñ ko
denā thā tunuk raḥm bhī bedād-garoñ ko

*{932,2}

āñkhoñ se huʾī ḳhānah-ḳharābī-e dil ai kāsh
kar lete tabhī band ham un donoñ daroñ ko

*{932,3}

parvāz-e gulistāñ ke to shāʾistah nah nikle
parvānah namat̤ āg ham ab deñge paroñ ko

*{932,4}

sab t̤āʾir-e qudsī haiñ jo yih zer-e falak haiñ
mūñdā hai kahāñ ʿishq ne in jānvaroñ ko

{932,5}

zinhār tire dil kī tavajjuh nah ho īdhar
āge tire ham-kāṛh rakheñ gar jigaroñ ko

{932,6}

pairāhan-e ṣad-chāk silāte haiñ mirā log
tah se nahīñ mut̤laq ḳhabar un be-ḳhabaroñ ko

{932,7}

jūñ ashk jahāñ jāte raheñge to gaʾe phir
dekhā karo ṭuk ān ke ham dīdah-taroñ ko

{932,8}

us bāġh ke har gul se chipak jātī haiñ āñkheñ
mushkil banī hai ān ke ṣāḥib naz̤aroñ ko

{932,9}

ādāb-e junūñ chāhiye ham se koʾī sīkhe
dekhā hai bahut yāroñ ne āshuftah-saroñ ko

*{932,10}

andeshah kī jāgah hai bahut mīr-jī marnā
dar-pesh ʿajab rāh hai ham nau-safaroñ ko