ʿishq tāṡīr se naumed nahīñ
jāñ sipārī shajar-e bed nahīñ
salt̤anat dast bah dast āʾī hai
jām-e mai ḳhātim-e jamshed nahīñ
hai tajallī tirī sāmān-e vujūd
żarrah be-partav-e ḳhvurshed nahīñ
rāz-e maʿshūq nah rusvā ho jāʾe
varnah mar jāne meñ kuchh bhed nahīñ
gardish-e rang-e t̤arab se ḍar hai
ġham-e maḥrūmī-e jāved nahīñ
kahte haiñ jīte haiñ ummīd pah log
ham ko jīne kī bhī ummed nahīñ
mai-kashī ko nah samajh be-ḥāṣil
bādah ġhālib ʿaraq-e bed nahīñ