Qubbat ul-Islam Mosque, from the Berger Collection
Qubbat ul-Islam Mosque, from the Berger Collection
nahīñ kih mujh ko qiyāmat kā ětiqād
nahīñ
shab-e firāq se roz-e jazā ziyād nahīñ
koʾī kahe kih shab-e mah meñ kyā
burāʾī hai
balā se āj agar din ko abr-o-bād nahīñ
jo āʾūñ sāmne un ke to marḥabā
nah kaheñ
jo jāʾūñ vāñ se kahīñ ko to ḳhair-bād nahīñ
kabhī jo yād bhī ātā hūñ maiñ
to kahte haiñ
kih āj bazm meñ kuchh fitnah-o-fasād nahīñ
ʿalāvah ʿīd ke miltī hai aur din
bhī sharāb
gadā-e kūchah-e mai-ḳhānah nā-murād nahīñ
jahāñ meñ ho ġham-o-shādī baham
hameñ kyā kām
diyā hai ham ko ḳhudā ne vuh dil kih shād nahīñ
tum un ke vaʿde kā żikr un se kyūñ
karo ġhālib
yih kyā kih tum kaho aur vuh kaheñ kih yād nahīñ