Qutb Minar, from the Berger Collection

Ghazal 108

8 divan verses (1 of 7 + 7 of 7); rhyming elements: ā bāñdhte haiñ
composed 1821; Arshi #92

-- urdu script -- devanagari -- diacritics -- plain roman -- more information --

{108,1}

tere tausan ko ṣabā bāñdhte haiñ
ham bhī maẓmūñ kī havā bāñdhte haiñ

{108,2}

āh kā kis ne aṡar dekhā hai
ham bhī ek apnī havā bāñdhte haiñ

{108,3}

terī furṣat ke muqābil ai ʿumr
barq ko pā bah ḥinā bāñdhte haiñ

{108,4}

qaid-e hastī se rihāʾī maʿlūm
ashk ko be sar-o-pā bāñdhte haiñ

{108,5}

nashshah-e rang se hai vā-shud-e gul
mast kab band-e qabā bāñdhte haiñ

{108,6}

ġhalat̤īhā-e maẓāmīñ mat pūchh
log nāle ko rasā bāñdhte haiñ

{108,7}

ahl-e tadbīr kī vā-māñdagiyāñ
ābiloñ par bhī ḥinā bāñdhte haiñ

{108,8}

sādah purkār haiñ ḳhūbāñ ġhālib
ham se paimān-e vafā bāñdhte haiñ

The unpublished verses from the first of the two original ghazals:

{108,9x}

pāñv meñ jab vuh ḥinā bāñdhte haiñ
mere hāthoñ ko judā bāñdhte haiñ

{108,10x}

ḥusn-e afsurdah-dilīhā rangīñ
shauq ko pā bah ḥinā bāñdhte haiñ

{108,11x}

qaid meñ bhī hai asīrī āzād
chashm-e zanjīr ko vā bāñdhte haiñ

{108,12x}

shaiḳh jī kaʿbe kā jānā maʿlūm
āp masjid meñ gadhā bāñdhte haiñ

{108,13x}

kis kā dil zulf se bhāgā kih asad
dast-e shānah bah qaẓā bāñdhte haiñ

{108,14x}

tere bīmār pah haiñ faryādī
vuh jo kāġhaż meñ davā bāñdhte haiñ