Agra Fort, from the Berger Collection
Agra Fort, from the Berger Collection
har ek bāt pah kahte ho tum kih tū
kyā hai
tumhīñ kaho kih yih andāz-e guft-gū kyā hai
nah shuʿle meñ yih karishmah nah barq
meñ yih adā
koʾī batāʾo kih vuh shoḳh-e tund-ḳhū kyā hai
yih rashk hai kih vuh hotā hai ham-suḳhan
tum se
vagarnah ḳhauf-e bad-āmozī-e ʿadū kyā hai
chipak rahā hai badan par lahū se
pairāhan
hamāre jeb ko ab ḥājat-e rafū kyā hai
jalā hai jism jahāñ dil bhī jal
gayā hogā
kuredte ho jo ab rākh just-jū kyā hai
ragoñ meñ dauṛte phirne ke ham nahīñ
qāʾil
jab āñkh se hī nah ṭapkā to phir lahū kyā hai
vuh chīz jis ke liye ham ko ho bihisht
ʿazīz
sivā-e bādah-e gul-fām-e mushk-bū kyā hai
piyūñ sharāb agar ḳhum bhī dekh
lūñ do chār
yih shīshah-o-qadaḥ-o-kūzah-o-sabū kyā hai
rahī nah t̤āqat-e guftār aur agar
ho bhī
to kis umīd pah kahye kih ārzū kyā hai
huʾā hai shah kā muṣāḥib phire
hai itrātā
vagarnah shahr meñ ġhālib kī āb-rū kyā hai