Agra Fort, from the Berger Collection
Agra Fort, from the Berger Collection
har qadam dūrī-e manzil hai
numāyāñ mujh se
merī raftār se bhāge hai bayābāñ mujh se
dars-e ʿunvān-e tamāshā
bah taġhāful ḳhvushtar
hai nigah rishtah-e shīrāzah-e mizhgāñ mujh se
vaḥshat-e ātish-e dil se
shab-e tanhāʾī meñ
ṣūrat-e dūd rahā sāyah gurezāñ mujh se
ġham-e ʿushshāq nah ho
sādagī-āmoz-e butāñ
kis qadar ḳhānah-e āʾīnah hai vīrāñ mujh se
aṡar-e āblah se jādah-e
ṣaḥrā-e junūñ
ṣūrat-e rishtah-e gauhar hai chirāġhāñ mujh se
be-ḳhvudī bistar-e tamhīd-e
farāġhat hūjo
pur hai sāʾe kī t̤araḥ merā shabistāñ mujh se
shauq-e dīdār meñ gar tū
mujhe gardan māre
ho nigah miṡl-e gul-e shamʿa pareshāñ mujh se
bekasīhā-e shab-e hijr kī
vaḥshat hai hai
sāyah ḳhvurshīd-e qiyāmat meñ hai pinhāñ mujh se
gardish-e sāġhar-e
ṣad-jalvah-e rangīñ tujh se
āʾinah-dārī-e yak dīdah-e ḥairāñ mujh se
nigah-e garm se ik āg
ṭapaktī hai asad
hai chirāġhāñ ḳhas-o-ḳhāshāk-e gulistāñ mujh se
bastan-e ʿahd-e muḥabbat hamah
nā-dānī thā
chashm-e nakshūdah rahā ʿuqdah-e paimāñ mujh se
ātish-afrozī-e yak shuʿlah-e
īmā tujh se
chashmak-ārāʾī-e ṣad-shahr chirāġhāñ mujh se