See the script bar at the bottom of the page for viewing choices.
[*09* cont'd] baʿẓ pāgal aise bhī the jo pāgal nahīñ the - un meñ akṡariyat aise qātiloñ kī thī jin ke rishtah-dāroñ ne afsaroñ ko de dilā kar pāgal-ḳhāne bhijvā diyā thā kih phāñsī ke phande se bach jāʾeñ - yih kuchh kuchh samajhte the kih hindūstān kyūñ taqsīm huʾā hai aur yih pākistān kyā hai - lekin ṣaḥīḥ vāqiʿāt se yih bhī be-ḳhabar the - aḳhbāroñ se kuchh patā nahīñ chaltā thā aur pahrah-dār sipāhī anpaṛh aur jāhil the - un kī guftagū se bhī vuh koʾī natījah bar-āmad nahīñ kar sakte the - un ko ṣirf itnā maʿlūm thā kih ek ādmī muḥammad ʿalī jināḥ hai jis ko qāʾid-e aʿz̤am kahte haiñ - us ne musalmānoñ ke liʾe ek ʿilâḥidah mulk banāyā hai jis kā nām pākistān hai --- yih kahāñ hai , us kā maḥll-e vuqūʿ kyā hai - us ke mutaʿlliq vuh kuchh nahīñ jānte the - yihī vajah hai kih pāgal-ḳhāne meñ vuh sab pāgal jin kā dimāġh pūrī t̤arḥ māʾūf nahīñ huʾā thā is maḳhmaṣe meñ giriftār the kih vuh pākistān meñ haiñ yā hindūstān meñ - agar hindūstān meñ haiñ to pākistān kahāñ hai - agar vuh pākistān meñ haiñ to yih kaise ho saktā hai kih vuh kuchh ʿarṣah pahle yihīñ rahte huʾe bhī hindūstān meñ the -
*to translation section (3)* -- *on to text section (4)*
-- "Toba Tek Singh" index page -- *Platts Dictionary Online* -- FWP's main page --
