See the script bar at the bottom of the page for viewing choices.
[*11* cont'd] lāhor kā ek naujavān hindū vakīl thā jo muḥabbat meñ nā-kām ho kar pāgal ho gayā thā - jab us ne sunā kih amritsar hindūstān meñ chalā gayā hai to use bahut dukh huʾā - usī shahr kī ek hindū laṛkī se use muḥabbat ho gaʾī thī - go us ne us vakīl ko ṭhakrā diyā thā magar dīvānagī kī ḥālat meñ bhī vuh us ko nahīñ bhūlā thā - chunāñchih un tamām hindū aur muslim līḍaroñ ko gāliyāñ detā thā jinhoñ ne mil milā kar hindūstān ke do ṭukṛe kar diʾe --- us kī maḥbūbah hindūstānī ban gaʾī aur vuh pākistānī -
jab tabādile kī bāt shurūʿ huʾī to vakīl ko kaʾī pāgaloñ ne samjhāyā kih vuh dil burā nah kare - us ko hindūstān bhej diyā jāʾegā - us hindūstān meñ jahāñ us kī maḥbūbah rahtī hai - magar vuh lāhor chhoṛnā nahīñ chāhtā thā - is liʾe kih us kā ḳhiyāl thā kih amritsar meñ us kī prekṭis nahīñ chalegī -
yūropīn vārḍ meñ do aiñglo-inḍiyan pāgal the - un ko jab maʿlūm huʾā kih hindūstān ko āzād kar ke angrez chale gaʾe haiñ to un ko bahut ṣadmah huʾā - vuh chhup chhup kar ghañṭoñ āpas meñ is aham masaʾle par guftagū karte rahte kih pāgal-ḳhāne meñ [*12*] ab un kī ḥaiṡiyat kis qism kī hogī - yūropīn vārḍ rahegā yā uṛā diyā jāʾegā - brek fāsṭ milā karegā yā nahīñ - kyā uñheñ ḍabl roṭī ke bajāʾe blaḍī inḍiyan chapāṭī to zahr mār nahīñ karnā paṛegī -
*to translation section (5)* -- *on to text section (6)*
-- "Toba Tek Singh" index page -- *Platts Dictionary Online* -- FWP's main page --
