See the script bar at the bottom of the page for viewing choices.
[*14* cont'd] us kī ek laṛkī thī jo har mahīne ek uñglī baṛhtī baṛhtī pandrah barasoñ meñ javān ho gaʾī thī - bishan siñgh us ko pahchāntā hī nahīñ thā - vuh bachchī thī jab [*15*] bhī apne bāp ko dekh kar rotī thī , javān huʾī tab bhī us kī āñkhoñ se āñsū bahte the -
pākistān aur hindūstān kā qiṣṣah shurūʿ huʾā to us ne dūsre pāgaloñ se pūchhnā shurūʿ kiyā kih ṭobah ṭek siñgh kahāñ hai - jab it̤mīnān-baḳhsh javāb nah milā to us kī kured din-badin baṛhtī gaʾī - ab mulāqāt bhī nahīñ ātī thī - pahle to use apne āp patah chal jātā thā kih milne vāle ā rahe haiñ , par ab jaise us ke dil kī āvāz bhī band ho gaʾī thī jo use un kī āmad kī ḳhabar de diyā kartī thī -
us kī baṛī ḳhvāhish thī kih vuh log āʾeñ jo us se hamdardī kā iz̤ahār karte the aur us ke liʾe phal , miṭhāʾiyāñ aur kapṛe lāte the - vuh agar un se pūchhtā kih ṭobah ṭek siñgh kahāñ hai to vuh yaqīnaṅ use batā dete kih pākistān meñ hai yā hindūstān meñ - kyūñkih us kā ḳhiyāl thā kih vuh ṭobah ṭek siñgh hī se āte haiñ jahāñ us kī zamīneñ haiñ -
*to translation section (8)* -- *on to text section (9)*
-- "Toba Tek Singh" index page -- *Platts Dictionary Online* -- FWP's main page --
