ghazal |
![]() |
sādah-żahnī meñ nuktah-chīñ the tum
ab to haiñ ḥarf-āshnā ṣāḥib
nah diyā raḥm ṭuk butoñ ke taʾīñ
kyā kiyā hāʾe yih ḳhudā ṣāḥib
bandagī ek apnī kyā kam hai
aur kuchh tum se kahye kyā ṣāḥib
mihr-afzā hai muñh tumhārā hī
kuchh ġhaẓab to nahīñ huʾā ṣāḥib
ḳhat̤ ke phaṭne kā tum se kyā shikvah
apne t̤āliʿ kā yih likhā ṣāḥib
phir gaʾīñ āñkheñ tum nah ān phire
dekhā tum ko bhī vāh vā ṣāḥib
shauq-e ruḳh yād-e lab ġham-e dīdār
jī meñ kyā kyā mire rahā ṣāḥib
bhūl jānā nahīñ ġhulām kā ḳhūb
yād-e ḳhāt̤ir rahe mirā ṣāḥib
kin ne sun shiʿr-e mīr yih nah kahā
kahyo phir hāʾe kyā kahā ṣāḥib