ghazal |
![]() |
yūñ kab hamāre āñsū puchheñ haiñ kih tū ne shoḳh
dekhā kabhū idhar mizhah-e nīm-bāz se
ḳhāmosh rah sake nah to baṛh kar bhī kuchh nah kah'h
sar shamʿa kā kaṭe hai zabān-e darāz se
ab jā kisū daraḳht ke sāʾe meñ baiṭhiye
is t̤aur phirye kab taʾīñ be-barg-o-sāz se
yih kyā kih dushmanoñ meñ mujhe sān'ne lage
karte kisū ko żabḥ bhī to imtiyāz se
mānind-e shamʿa ṭapke hī paṛte haiñ ab to ashk
kuchh jalte jalte ho gaʾe haiñ ham gudāz se
shāyad kih āj rāt ko the maikade meñ mīr
khele thā ek muġh-bachah muhr-e namāz se