dost ġham-ḳhvārī meñ merī saʿī farmāveñge
kyā
zaḳhm ke bharne talak nāḳhun nah baṛh jāveñge kyā
be-niyāzī ḥad se guzrī bandah-parvar kab talak
ham kaheñge ḥāl-e dil aur āp farmāveñge kyā
ḥaẓrat-e nāṣiḥ gar āveñ dīdah-o-dil farsh-e rāh
koʾī mujh ko yih to samjhā do kih samjhāveñge kyā
āj vāñ teġh-o-kafan bāñdhe huʾe jātā hūñ maiñ
ʿużr mere qatl karne meñ vuh ab lāveñge kyā
gar kiyā nāṣiḥ ne ham ko qaid achchhā yūñ sahī
yih junūn-e ʿishq ke andāz chhuṭ jāveñge kyā
ḳhānah-zād-e zulf haiñ zanjīr se
bhāgeñge kyūñ
haiñ giriftār-e vafā zindāñ se ghabrāveñge kyā
hai ab is maʿmūre meñ qaḥt̤-e ġham-e ulfat asad
ham ne yih mānā kih dillī meñ rahe khāveñge kyā