Fatahpur Sikri, from the Berger Collection
Fatahpur Sikri, from the Berger Collection
gar nah andoh-e shab-e furqat bayāñ
ho jāʾegā
be-takalluf dāġh-e mah muhr-e dahāñ ho jāʾegā
zahrah gar aisā hī shām-e hijr meñ hotā hai āb
partav-e mahtāb sail-e ḳhān-māñ ho jāʾegā
le to lūñ sote meñ us ke pāñv kā bosah magar
aisī bātoñ se vuh kāfir bad-gumāñ ho jāʾegā
dil ko ham ṣarf-e vafā samjhe the kyā maʿlūm thā
yaʿnī yih pahle hī nażr-e imtiḥāñ ho jāʾegā
sab ke dil meñ hai jagah terī jo tū rāẓī huʾā
mujh pah goyā ik zamānah mihr-bāñ ho jāʾegā
gar nigāh-e garm farmātī rahī taʿlīm-e ẓabt̤
shuʿlah ḳhas meñ jaise ḳhūñ rag meñ nihāñ ho jāʾegā
bāġh meñ mujh ko nah le jā varnah mere ḥāl par
har gul-e tar ek chashm-e ḳhūñ-fishāñ ho jāʾegā
vāʾe gar merā tirā inṣāf maḥshar meñ nah ho
ab talak to yih tavaqquʿ hai kih vāñ ho jāʾegā
fāʾidah kyā soch āḳhir tū bhī dānā hai asad
dostī nā-dāñ kī hai jī kā ziyāñ ho jāʾegā
gar vuh mast-e nāz devegā ṣalā-e ʿarẓ-e ḥāl
ḳhār-e gul bahr-e dahān-e gul zabāñ ho jāʾegā
gar shahādat ārzū hai nashʾe meñ gustāḳh ho
bāl shīshe kā rag-e sang-e fasāñ ho jāʾegā