Ghazal 97

{97,1}

miltī hai ḳhū-e yār se nār iltihāb meñ
kāfir hūñ gar nah miltī ho rāḥat ʿażāb meñ

{97,2}

kab se hūñ kyā batāʾūñ jahān-e ḳharāb meñ
shab'hā-e hijr ko bhī rakhūñ gar ḥisāb meñ

{97,3}

tā phir nah intiz̤ār meñ nīñd āʾe ʿumr bhar
āne kā ʿahd kar gaʾe āʾe jo ḳhvāb meñ

{97,4}

qāṣid ke āte āte ḳhat̤ ik aur likh rakhūñ
maiñ jāntā hūñ jo vuh likheñge javāb meñ

{97,5}

mujh tak kab un kī bazm meñ ātā thā daur-e jām
sāqī ne kuchh milā nah diyā ho sharāb meñ

{97,6}

jo munkar-e vafā ho fareb us pah kyā chale
kyūñ bad-gumāñ hūñ dost se dushman ke bāb meñ

{97,7}

maiñ muẓt̤arib hūñ vaṣl meñ ḳhauf-e raqīb se
ḍālā hai tum ko vahm ne kis pech-o-tāb meñ

{97,8}

maiñ aur ḥaz̤z̤-e vaṣl ḳhudā-sāz bāt hai
jāñ nażr denī bhūl gayā iẓt̤irāb meñ

{97,9}

hai tevarī chaṛhī huʾī andar naqāb ke
hai ik shikan paṛī huʾī t̤arf-e naqāb meñ

{97,10}

lākhoñ lagāʾo ek churānā nigāh kā
lākhoñ banāʾo ek bigaṛnā ʿitāb meñ

{97,11}

vuh nālah dil meñ ḳhas ke barābar jagah nah pāʾe
jis nāle se shigāf paṛe āftāb meñ

{97,12}

vuh siḥr muddaʿā-t̤alabī meñ nah kām āʾe
jis siḥr se safīnah ravāñ ho sarāb meñ

{97,13}

Some divan editions treat this and the following ghazal, {98}, as a single long ghazal.

ġhālib chhuṭī sharāb par ab bhī kabhī kabhī
pītā hūñ roz-e abr-o-shab-e māh-tāb meñ