Ghazal 162

{162,1}

dil-e nā-dāñ tujhe huʾā kyā hai
āḳhir is dard kī davā kyā hai

{162,2}

ham haiñ mushtāq aur vuh be-zār
yā ilâhī yih mājrā kyā hai

{162,3}

maiñ bhī muñh meñ zabān rakhtā hūñ
kāsh pūchho kih muddaʿā kyā hai

{162,4}

This verse is the beginning of a verse-set that includes {162, 4-7}.

jab kih tujh bin nahīñ koʾī maujūd
phir yih hangāmah ai ḳhudā kyā hai

{162,5}

yih parī-chahrah log kaise haiñ
ġhamzah-o-ʿishvah-o-adā kyā hai

{162,6}

shikan-e zulf-e ʿanbarīñ kyūñ hai
nigah-e chashm-e surmah-sā kyā hai

{162,7}

sabzah-o-gul kahāñ se āʾe haiñ
abr kyā chīz hai havā kyā hai

{162,8}

ham ko un se vafā kī hai ummīd
jo nahīñ jānte vafā kyā hai

{162,9}

hāñ bhalā kar tirā bhalā hogā
aur darvesh kī ṣadā kyā hai

{162,10}

jān tum par niṡār kartā hūñ
maiñ nahīñ jāntā duʿā kyā hai

{162,11}

maiñ ne mānā kih kuchh nahīñ ġhālib
muft hāth āʾe to burā kyā hai