Agra Fort, from the Berger Collection
Agra Fort, from the Berger Collection
hujūm-e ġham se yāñ tak sar-nigūnī
mujh ko ḥāṣil hai
kih tār-e dāman-o-tār-e naz̤ar meñ farq mushkil hai
rafū-e zaḳhm se mat̤lab hai lażżat
zaḳhm-e sozan kī
samajhyo mat kih pās-e dard se dīvānah ġhāfil hai
vuh gul jis gulsitāñ meñ jalvah-farmāʾī
kare ġhālib
chaṭaknā ġhunchah-e gul kā ṣadā-e ḳhandah-e dil hai
huʾā hai mānʿa-e ʿāshiq-navāzī nāz-e ḳhvud-bīnī
takalluf bar-t̤araf āʾīnah-e tamyīz ḥāʾil hai
bah sail-e ashk laḳht-e dil hai dāman-gīr mizhgāñ kā
ġharīq-e baḥr jūyā-e ḳhas-o-ḳhāshāk-e sāḥil hai