ghazal
{226}
 
-- urdu script -- devanagari -- diacritics -- plain roman -- more information --
 

*{226,1}

jhūṭe bhī pūchhte nahīñ ṭuk ḥāl ān kar
an-jān itne kyūñ huʾe jāte ho jān kar

*{226,2}

ve log tum ne ek hī shoḳhī meñ kho diye
paidā kiye the charḳh ne jo ḳhāk chhān kar

{226,3}

jhamke dikhā ke bāʾiṡ-e hangāmah hī rahe
par ghar se dar pah āʾe nah tum bāt mān kar

*{226,4}

kahte nah the kih jān se jāte raheñge ham
achchhā nahīñ hai ā nah hameñ imtiḥān kar

{226,5}

kam-go jo ham huʾe to sitam kuchh nah ho gayā
achchhī nahīñ yih bāt mat itnī zabān kar

*{226,6}

ham ve haiñ jin ke ḳhūñ se tirī rāh sab hai gul
mat kar ḳharāb ham ko tū auroñ meñ sān kar

{226,7}

tā kushtah-e vafā mujhe jāne tamām ḳhalq
turbat pah merī ḳhūn se mere nishān kar

{226,8}

nāz-o-ʿitāb-o-ḳhashm kahāñ tak uṭhāʾiye
yā rab kabhū to ham pah use mihrbān kar

*{226,9}

afsāne mā-o-man ke suneñ mīr kab talak
chal ab kih soveñ muñh pah dū-paṭṭe ko tān kar