ghazal |
![]() |
kab se āne kahte haiñ tashrīf nahīñ lāte haiñ hanūz
āñkheñ mundīñ ab jā chuke ham ve dekho to āte haiñ hanūz
kahtā hai barsoñ se hameñ tum dūr ho yāñ se dafʿa bhī ho
shauq-o-samājat sair karo ham pās us ke jāte haiñ hanūz
rātoñ pās gale lag soʾe nange ho kar hai yih ʿajab
din ko be-pardah nahīñ milte ham se sharmāte haiñ hanūz
sāth ke paṛhne-vāle fāriġh taḥṣīl-e ʿilmī se huʾe
jahl se maktab ke laṛkoñ meñ ham dil bahlāte haiñ hanūz
gul ṣad-rang chaman meñ āʾe bād-e ḳhizāñ se bikhar bhī gaʾe
ʿishq-o-junūñ kī bahār ke ʿāshiq mīr-jī gul khāte haiñ hanūz