Tughluqabad

Lodhi tombs, from the Berger Collection

 

Ghazal 78

7 verses (out of 8); rhyming elements: ar hote tak
composed 1821; Arshi #78

-- urdu script -- devanagari -- diacritics -- plain roman -- more information --

{78,1}

āh ko chāhiye ik ʿumr aṡar hote tak
kaun jītā hai tirī zulf ke sar hote tak

{78,2}

dām-e har mauj meñ hai ḥalqah-e ṣad kām-e nihang
dekheñ kyā guzre hai qat̤re pah guhar hote tak

{78,3}

ʿāshiqī ṣabr-t̤alab aur tamannā betāb
dil kā kyā rang karūñ ḳhūn-e jigar hote tak

{78,4}

ham ne mānā kih taġhāful nah karoge lekin
ḳhāk ho jāʾeñge ham tum ko ḳhabar hote tak

{78,5}

partav-e ḳhvur se hai shabnam ko fanā kī taʿlīm
maiñ bhī hūñ ek ʿināyat kī naz̤ar hote tak

{78,6}

yak naz̤ar besh nahīñ furṣat-e hastī ġhāfil
garmī-e bazm hai ik raqṣ-e sharar hote tak

{78,7}

ġham-e hastī kā asad kis se ho juz marg ʿilāj
shamʿa har rang meñ jaltī hai saḥar hote tak

The unpublished verse from this ghazal:

{78,8x}

tā qiyāmat shab-e furqat meñ guzar jāʾegī ʿumr
sāt din ham pah bhī bhārī haiñ saḥar hote tak