Agra Fort, from the Berger Collection
Agra Fort, from the Berger Collection
dekhnā qismat kih āp apne pah rashk
ā jāʾe hai
maiñ use dekhūñ bhalā kab mujh se dekhā jāʾe hai
hāth dho dil se yihī garmī gar andeshe
meñ hai
āb-gīnah tundī-e ṣahbā se pighlā jāʾe hai
ġhair ko yā rab vuh kyūñkar manʿa-e
gustāḳhī kare
gar ḥayā bhī us ko ātī hai to sharmā jāʾe hai
shauq ko yih lat kih har dam nālah
kheñche jāʾiye
dil kī vuh ḥālat kih dam lene se ghabrā jāʾe hai
dūr chashm-e bad tirī bazm-e t̤arab
se vāh vāh
naġhmah ho jātā hai vāñ gar nālah merā jāʾe hai
garchih hai t̤arz-e taġhāful pardah-dār-e
rāz-e ʿishq
par ham aise khoʾe jāte haiñ kih vuh pā jāʾe hai
us kī bazm-ārāʾiyāñ sun kar dil-e
ranjūr yāñ
miṡl-e naqsh-e muddaʿā-e ġhair baiṭhā jāʾe hai
ho ke ʿāshiq vuh parī-ruḳh aur nāzuk
ban gayā
rang khultā jāʾe hai jitnā kih uṛtā jāʾe hai
naqsh ko us ke muṣavvir par bhī kyā
kyā nāz haiñ
kheñchtā hai jis qadar utnā hī khiñchtā jāʾe hai
sāyah merā mujh se miṡl-e dūd bhāge
hai asad
pās mujh ātish bah jāñ ke kis se ṭhahrā jāʾe hai