Ghazal 177

{177,1}

shikve ke nām se be-mihr ḳhafā hotā hai
yih bhī mat kah kih jo kahye to gilā hotā hai

{177,2}

pur hūñ maiñ shikve se yūñ rāg se jaise bājā
ik żarā chheṛiye phir dekhiye kyā hotā hai

{177,3}

go samajhtā nahīñ par ḥusn-e talāfī dekho
shikvah-e jaur se sar-garm-e jafā hotā hai

{177,4}

ʿishq kī rāh meñ hai charḳh-e mukaukab kī vuh chāl
sust-rū jaise koʾī ābilah-pā hotā hai

{177,5}

kyūñ nah ṭhahreñ hadaf-e nāvak-e be-dād kih ham
āp uṭhā lāte haiñ gar tīr ḳhat̤ā hotā hai

{177,6}

ḳhūb thā pahle se hote jo ham apne bad-ḳhvāh
kih bhalā chāhte haiñ aur burā hotā hai

{177,7}

nālah jātā thā pare ʿarsh se merā aur ab
lab tak ātā hai jo aisā hī rasā hotā hai

{177,8}

ḳhāmah merā kih vuh hai bārbud-e bazm-e suḳhan
shāh kī madḥ meñ yūñ naġhmah-sarā hotā hai

{177,9}

This verse is the beginning of a verse-set that includes {177,9-12}.

ai shahinshāh-e kavākib-sipah-o-mihr-ʿalam
tere ikrām kā ḥaq kis se adā hotā hai

{177,10}

sāt iqlīm kā ḥāṣil jo farāham kīje
to vuh lashkar kā tire naʿl-bahā hotā hai

{177,11}

har mahīne meñ jo yih badr se hotā hai hilāl
āstāñ par tire mah nāṣiyah-sā hotā hai

{177,12}

maiñ jo gustāḳh hūñ āʾīn-e ġhazal-ḳhvānī meñ
yih bhī terā hī karam żauq-fizā hotā hai

{177,13}

rakhyo ġhālib mujhe is talḳh-navāʾī meñ muʿāf
āj kuchh dard mire dil meñ sivā hotā hai