Agra Fort, from the Berger Collection

Ghazal 233

17 divan verses (out of 17); rhyming elements: āñ kiye huʾe
composed after 1816; Arshi #190

-- urdu script -- devanagari -- diacritics -- plain roman -- more information --

{233,1}

muddat huʾī hai yār ko mihmāñ kiye huʾe
josh-e qadaḥ se bazm chirāġhāñ kiye huʾe

{233,2}

kartā hūñ jamʿa phir jigar-e laḳht-laḳht ko
ʿarṣah huʾā hai daʿvat-e mizhgāñ kiye huʾe

{233,3}

phir vaẓʿa-e iḥtiyāt̤ se rukne lagā hai dam
barsoñ huʾe haiñ chāk-e garebāñ kiye huʾe

{233,4}

phir garm-e nālah'hā-e sharar-bār hai nafas
muddat huʾī hai sair-e chirāġhāñ kiye huʾe

{233,5}

phir pursish-e jarāḥat-e dil ko chalā hai ʿishq
sāmān-e ṣad-hazār namak-dāñ kiye huʾe

{233,6}

phir bhar rahā hūñ ḳhāmah-e mizhgāñ bah ḳhūn-e dil
sāz-e chaman-t̤arāzī-e dāmāñ kiye huʾe

{233,7}

bā-ham-digar huʾe haiñ dil-o-dīdah phir raqīb
naz̤z̤ārah-o-ḳhayāl kā sāmāñ kiye huʾe

{233,8}

dil phir t̤avāf-e kū-e malāmat ko jāʾe hai
pindār kā ṣanam-kadah vīrāñ kiye huʾe

{233,9}

phir shauq kar rahā hai ḳharīdār kī t̤alab
ʿarẓ-e matāʿ-e ʿaql-o-dil-o-jāñ kiye huʾe

{233,10}

dauṛe hai phir har ek gul-o-lālah par ḳhayāl
ṣad gulsitāñ nigāh kā sāmāñ kiye huʾe

{233,11}

phir chāhtā hūñ nāmah-e dildār kholnā
jāñ nażr-e dil-farebī-e ʿunvāñ kiye huʾe

{233,12}

māñge hai phir kisī ko lab-e bām par havas
zulf-e siyāh ruḳh pah pareshāñ kiye huʾe

{233,13}

chāhe hai phir kisī ko muqābil meñ ārzū
surme se tez dashnah-e mizhgāñ kiye huʾe

{233,14}

ik nau-bahār-e nāz ko tāke hai phir nigāh
chahrah furoġh-e mai se gulistāñ kiye huʾe

{233,15}

phir jī meñ hai kih dar pah kisī ke paṛe raheñ
sar zer-bār-e minnat-e darbāñ kiye huʾe

{233,16}

jī ḍhūñḍhtā hai phir vuhī furṣat kih rāt din
baiṭhe raheñ taṣavvur-e jānāñ kiye huʾe

{233,17}

ġhālib hameñ nah chheṛ kih phir josh-e ashk se
baiṭhe haiñ ham tahīyah-e t̤ūfāñ kiye huʾe