ghazal
{313}
 
-- urdu script -- devanagari -- diacritics -- plain roman -- more information --
 

*{313,1}

kiyā jo ʿarẓ kih dil sā shikār lāyā hūñ
kahā kih aise to maiñ muft mār lāyā hūñ

{313,2}

kahe tū naḳhl-e ṣanaubar hūñ is chaman meñ maiñ
kih sar se pāʾoñ talak dil hī bār lāyā hūñ

{313,3}

jahāñ meñ giryah nah pahuñchā baham mujhe dil-ḳhvāh
pah nūḥ ke se to t̤ūfāñ hazār lāyā hūñ

*{313,4}

nah tang kar use ai fikr-e rozgār kih maiñ
dil us se dam ke liye mustaʿār lāyā hūñ

{313,5}

kisī se māñgā hai maiñ āj tak kih jī leve
yih iḥtiyāj tujhī tak ai yār lāyā hūñ

{313,6}

phir iḳhtiyār hai āge tirā yih hai majbūr
kih dil ko tujh taʾīñ be-iḳhtiyār lāyā hūñ

*{313,7}

yih jī jo mere gale kā hai hār tū hī le
tire gale ke liye maiñ yih hār lāyā hūñ

*{313,8}

chalā nah uṭh ke vahīñ chupke chupke phir to mīr
abhī to us kī galī se pukār lāyā hūñ