ghazal
{605}
 
-- urdu script -- devanagari -- diacritics -- plain roman -- more information --
 

*{605,1}

faqīrānah āʾe ṣadā kar chale
kih myāñ ḳhvush raho ham duʿā kar chale

{605,2}

jo tujh bin nah jīne ko kahte the ham
so is ʿahd ko ab vafā kar chale

{605,3}

shifā apnī taqdīr hī meñ nah thī
kih maqdūr tak to davā kar chale

{605,4}

paṛe aise asbāb-e pāyān-kār
kih nā-chār yūñ jī jalā kar chale

*{605,5}

vuh kyā chīz hai āh jis ke liye
har ik chīz se dil uṭhā kar chale

*{605,6}

koʾī nā-umīdānah karte nigāh
so tum ham se muñh bhī chhupā kar chale

{605,7}

bahut ārzū thī galī kī tirī
so yāñ se lahū meñ nahā kar chale

{605,8}

dikhāʾī diye yūñ kih be-ḳhvud kiyā
hameñ āp se bhī judā kar chale

{605,9}

jabīñ sijde karte hī karte gaʾī
ḥaq-e bandagī ham adā kar chale

{605,10}

parastish kī yāñ tak kih ai but tujhe
naz̤ar meñ sabhoñ kī ḳhudā kar chale

{605,11}

jhuṛe phūl jis rang gulbun se yūñ
chaman meñ jahāñ ke ham ā kar chale

{605,12}

nah dekhā ġham-e dostāñ shukr se
hamīñ dāġh apnā dikhā kar chale

{605,13}

gaʾī ʿumr dar-band-e fikr-e ġhazal
so is fan ko aisā baṛā kar chale

{605,14}

kaheñ kyā jo pūchhe koʾī ham se mīr
jahāñ meñ tum āʾe the kyā kar chale

 

{605,trans.}

Translations