ghazal
{1176}
 
-- urdu script -- devanagari -- diacritics -- plain roman -- more information --
 

*{1176,1}

ro chukā ḳhūn-e jigar sab ab jigar meñ ḳhūñ kahāñ
ġham se pānī ho ke kab kā bah'h gayā maiñ hūñ kahāñ

*{1176,2}

dast-o-dāman jeb-o-āġhosh apne is lāʾiq nah the
phūl maiñ us bāġh-e ḳhūbī se jo lūñ to lūñ kahāñ

{1176,3}

ʿāshiq-o-maʿshūq yāñ āḳhir fasāne ho gaʾe
jāʾe giryah hai jahāñ lailâ kahāñ majnūñ kahāñ

{1176,4}

āg barsī tīrah ʿālam ho gayā jādū se pur
un kī chashm-e pur-fusūñ ke sāmne afsūñ kahāñ

*{1176,5}

sair kī rangīñ bayāẓ-e bāġh kī ham ne bahut
sarv kā miṣraʿ kahāñ vuh qāmat-e mauzūñ kahāñ

*{1176,6}

kūchah har yak jā-e dilkash ʿālam-e ḳhākī meñ hai
par kahīñ lagtā nahīñ jī hāʾe maiñ dil dūñ kahāñ

*{1176,7}

ek dam se qais ke jangal bharā rahtā thā kyā
ab gaʾe par us ke vaisī raunaq-e hāmūñ kahāñ

{1176,8}

nāṣiḥ-e mushfiq to kahtā thā kih us se mat mile
par samajhtā hai hamārā yih dil-e maḥzūñ kahāñ

*{1176,9}

bāʾo ke ghoṛe pah the us bāġh ke sākin savār
ab kahāñ farhād-o-shīrīñ ḳhusrav-e gul-gūñ kahāñ

{1176,10}

khā gayā andoh mujh ko dostān-e raftah kā
ḍhūñḍhtā hai jī bahut par ab uñheñ pāʾūñ kahāñ

{1176,11}

thā vuh fitnah milne kī gūñ kab kisī darvesh ke
kyā kaheñ ham mīr ṣāḥib se huʾe maftūñ kahāñ