ghazal |
![]() |
kyā kyā ham ne ranj uṭhāʾe kyā kyā ham bhī shikebā the
do din jūñ tūñ jīte rahe so marne hī ke muhaiyā the
ʿishq kiyā so bāteñ banāʾīñ yaʿnī shiʿr shiʿār huʾā
baiteñ jo ve mashhūr huʾīñ to shahroñ shahroñ rusvā the
kyā pagṛī ko pher ke rakhte kyā sar nīche nah hotā thā
lut̤f nahīñ ab kyā kahye kuchh āge ham bhī kyā kyā the
ab ke viṣāl qarār diyā hai hijr hī kī sī ḥālat hai
ek samaiñ meñ dil be-jā thā to bhī ham ve yak-jā the
kyā hotā jo pās apne ai mīr kabhū ve ā jāte
ʿāshiq the darvesh the āḳhir be-kas bhī the tanhā the