ghazal
{2}
 
-- urdu script -- devanagari -- diacritics -- plain roman -- more information --
 

*{2,1}

kyā maiñ bhī pareshānī-e ḳhāt̤ir se qarīñ thā
āñkheñ to kahīñ thīñ dil-e ġham-dīdah kahīñ thā

*{2,2}

kis rāt naz̤ar kī hai sū-e chashmak-e anjum
āñkhoñ ke tale apne to vuh māh-jabīñ thā

{2,3}

āyā to sahī vuh koʾī dam ke liye lekin
hoñṭhoñ pah mire jab nafas-e bāz-pasīñ thā

*{2,4}

ab koft se hijrāñ kī jahāñ tan pah rakhā hāth
jo dard-o-alam thā so kahe tū kih vahīñ thā

*{2,5}

jānā nahīñ kuchh juz ġhazal ā kar ke jahāñ meñ
kul mere taṣarruf meñ yihī qit̤ʿah zamīñ thā

{2,6}

nām āj koʾī yāñ nahīñ letā hai unhoñ kā
jin logoñ ke kal mulk yih sab zer-e nagīñ thā

{2,7}

masjid meñ imām āj huʾā ā ke vahāñ se
kal tak to yihī mīr ḳharābāt-nishīñ thā