ghazal
{7}
 
-- urdu script -- devanagari -- diacritics -- plain roman -- more information --
 

*{7,1}

ulṭī ho gaʾīñ sab tadbīreñ kuchh nah davā ne kām kiyā
dekhā is bīmārī-e dil ne āḳhir kām tamām kiyā

*{7,2}

ʿahd-e javānī ro ro kāṭā pīrī meñ līñ āñkheñ mūñd
yaʿnī rāt bahut the jāge ṣubḥ huʾī ārām kiyā

[{7,3}]

ḥarf nahīñ jāñ-baḳhshī meñ us kī ḳhūbī apnī qismat kī
ham se jo pahle kah bhejā so marne kā paiġhām kiyā

*{7,4}

nā-ḥaq ham majbūroñ par yih tuhmat hai muḳhtārī kī
chāhte haiñ so āp kareñ haiñ ham ko ʿabaṡ bad-nām kiyā

[{7,5}]

sāre rind aubāsh jahāñ ke tujh se sujūd meñ rahte haiñ
bāñke ṭeṛhe tirchhe tīkhe sab kā tujh ko imām kiyā

*{7,6}

sar-zad ham se be-adabī to vaḥshat meñ bhī kam hī huʾī
kosoñ us kī or gaʾe par sijdah har har gām kiyā

[{7,7}]

kis kā kaʿbah kaisā qiblah kaun ḥaram hai kyā iḥrām
kūche ke us ke bāshindoñ ne sab ko yahīñ se salām kiyā

[{7,8}]

shaiḳh jo hai masjid meñ nangā rāt ko thā mai-ḳhāne meñ
jubbah ḳhirqah kurtā ṭopī mastī meñ inʿām kiyā

[{7,9}]

kāsh ab burqaʿ muñh se uṭhā de varnah phir kyā ḥāṣil hai
āñkh muñde par un ne go dīdār ko apne ʿām kiyā

*{7,10}

yāñ ke saped-o-siyah meñ ham ko daḳhl jo hai so itnā hai
rāt ko ro ro ṣubḥ kiyā yā din ko jūñ-tūñ shām kiyā

[{7,11}]

ṣubḥ chaman meñ us ko kahīñ taklīf-e havā le āʾī thī
ruḳh se gul ko mol liyā qāmat se sarv ġhulām kiyā

*{7,12}

sāʿid-e sīmīñ donoñ us ke hāth meñ lā kar chhoṛ diye
bhūle us ke qaul-o-qasam par hāʾe ḳhayāl-e ḳhām kiyā

[{7,13}]

kām huʾe haiñ sāre ẓāʾiʿ har sāʿat kī samājat se
istiġhnā kī chau-gunī un ne jūñ jūñ maiñ ibrām kiyā

*{7,14}

aise āhū-e ram-ḳhvurdah kī vaḥshat khonī mushkil thī
siḥr kiyā ějāz kiyā jin logoñ ne tujh ko rām kiyā

[{7,15}]

mīr ke dīn-o-mażhab ko ab pūchhte kyā ho un ne to
qashqah khaiñchā dair meñ baiṭhā kab kā tark islām kiyā

 

{7,trans.}

Translations