ghazal |
![]() |
shahr se yār savār huʾā jo savād meñ ḳhūb ġhubār hai āj
dashtī vaḥsh-o-t̤air us ke sar-tezī hī meñ shikār hai āj
bar-afroḳhtah ruḳh hai us kā kis ḳhūbī se mastī meñ
pī ke sharāb shiguftah huʾā hai us nau gul pah bahār hai āj
us kā baḥr-e ḥusn sarāsar auj-o-mauj-o-talāt̤um hai
shauq kī apne nigāh jahāñ tak jāve bos-o-kinār hai āj
āñkheñ us kī lāl huʾīñ haiñ aur chale jāte haiñ sar
rāt ko dārū pī soyā thā us kā ṣubḥ ḳhumār hai āj
ghar āʾe ho faqīroñ ke to āʾo baiṭho lut̤f karo
kyā hai jān bin apne kane so
in qadmoñ pah niṡār hai āj
kyā pūchho ho sāñjh talak pahlū meñ kyā kyā taṛpā hai
kal kī nisbat dil ko hamāre bāre kuchh to qarār hai āj
mat chūko is jins-e girāñ ko dil kī vahīñ le jāʾo tum
hindustān meñ hindū bachoñ kī bahut baṛī sarkār hai āj
ḳhūb jo āñkheñ khol ke dekhā shāḳh-e gul sā naz̤ar āyā
un rangoñ phūloñ meñ milā kuchh maḥv-e jalvah-e yār hai āj
jażb-e ʿishq jidhar chāhe le jāʾe hai maḥmil lailâ kā
yaʿnī hāth meñ majnūñ ke nāqe kī us ke mahār hai āj
rāt kā pahnā hār jo ab tak din ko utārā un ne nahīñ
shāyad mīr jamāl-e gul bhī us ke gale kā hār hai āj